新聞剪報

東京成功獲得2020年奧運主辦權，日本概念又再冒起，飛達帽業（1100）副主席兼董事總經理顏寶鈴就話，佢公司有幾個客都有贊助東京奧運。咁飛達帽業咪食正條水，搖身一變成為東京奧運概念股？

飛達帽業管理層就話，同日本人做生意都有9年，?家有5個日本客，雖然日本客戶數量唔多，但客戶代理品牌就好多，而且有唔少大運動品牌。

廠房搬去孟加拉

飛達之前連續發兩次盈警，話因為番禺廠房生產成本不斷上升，決定逐步將番禺廠房搬去孟加拉，仲為廠房、設備同存貨撥備1600萬元，搞到上半年業績由盈轉虧，蝕1686萬元。顏太就話，撥備是一次性，之後唔會再有，內地人工差唔多係孟加拉10倍，將廠房搬去孟加拉，可以慳到唔少成本。而由明年開始，孟加拉廠房產能將會佔公司整體產能50%。

顏太仲話，孟加拉工人一都唔蠢，「其實好Simple又好Smart」，而且佢手工又唔錯，可以話係「平靚正」。不過顏太話，孟加拉明年初有大選，都有擔心年底廠房運作會唔會受影響，睇可唔可以靈活安排開工時間應對。

擬設慈善基金

講開之前利豐（494）外判孟加拉製衣廠發生火災，造成員工傷亡，飛達管理層就話佢係幫唔同客戶生產，要過到唔同客戶生產安全要求，廠房生產安全要求相對較高。顏太又話，之後會考慮成立一個基金，幫助當地有需要人。顏太平時除做自己工業，都一直致力慈善事業，?家去到孟加拉做廠，都不忘將慈善進行到底，果然係好有善心。